esch-um-séi. däerfe
professere knäipen? eh bien, si maachen et einfach, ouni sech ze genéieren. den
neitste fall vu „guttenbergen“ zu lëtzebuerg (an net säin éischten!) dréit den
numm: jeff baden, senges zeechens ë. a. „vacataire“ op der uni lëtzebuerg,
einseignant am „institut national des langues“ a kulturkorrespondent am
„luxemburger wort“.
an der nr. 30 vun
OPUS, dem kulturmagazin fir d’saarland, rheinland-pfalz, louthréngen a
lëtzebuerg huet dëse fäinen här en artikel iwwert „literarisches schreiben in
luxemburg“ publizéiert, a sengem eegenen numm natierlech. leider si fënnef
véierel vun deem artikel – vum opbau, vun den iddiën an och vun de formuléierungen
hir, a ville fäll wuertwiertlech – aus der broschür „Apropos ... Literatur in
Luxemburg“ iwwerholl (fir et ze soen: geklaut!), déi ech 2004 am optrag vum SIP
zesummegestallt hunn. zwar mecht de jeff baden a sengem text en hiwäis op den
entspriechenden download am internet, vergësst awer z’ernimmen, datt hie säin
artikel do gréisstendeels a carrément ofgeschriwwen huet, ouni déi
entspriechend zitater ze kennzeechnen. dat wär och e bësse vill ginn, well de
baden-text ass op 4 vu 5 säiten entweder eng pur kopie oder eng jüst schlecht
kamufléiert paraphrase vun senger ëffentlech zougänglecher virlag.
wat huet den här
tarrach dozou ze soen? de cnl? d’kulturredaktioun vum LW, d’kulturministesch,
d’edukatiounsministesch? an de verlag, an deem OPUS erauskënnt? zu saarbrécken
wëssen se wahrscheinlech näischt vum lëtzebuerger „zu guttenberg“! ech hu si
mat engem mail drop opmierksam gemaach a sinn elo gespaant, ob a wéi se – grad
emol eng woch nom internationalen dag vum buch a vun den DROITS D’AUTEUR – reagéieren? am anere fall ...
